Го́споди! Да́ждь на́м зре́ти согреше́ния на́ша, да у́м на́ш, ве́сь ко внима́нию со́бственным на́шим прегреше́нием привлече́нный, прегреше́ния бли́жних ви́дети преста́нет, и та́ко вся́ бли́жняя благи́ми да уви́дит. Да́ждь се́рдцу на́шему па́губное попече́ние о не́мощех бли́жняго оста́вити, вся́ же попече́ния во еди́но попече́ние о стяжа́нии чистоты́ и святы́ни, Тобо́ю на́м заповеданней и угото́ванней, совокупи́ти. Да́ждь на́м, ри́зы душе́вныя осквернившим, па́ки ты́я убели́ти: бы́ша у́бо омыты уже́ Креще́ния вода́ми, ны́не же, по оскверне́нии, тре́буют сле́зными вода́ми омы́тися. Да́ждь на́м узре́ти, во све́те благода́ти Твоея́, многообра́зныя неду́ги, в на́с живу́щия, духо́вныя движе́ния в се́рдце потребляющия, движе́ния кровяная и плотяная, ца́рствию Бо́жию враждебная, во о́ное вводя́щая. Да́ждь на́м ве́лий да́р покая́ния, ве́лиим да́ром зре́ния грехо́в свои́х предшествуемый и ражда́емый. Охрани́ ны́ си́ми велицыми да́ры на пути́ на́шем к Тебе́ и да́ждь на́м Тебе́ дости́гнути, сознающих себе́ грешниками призыва́ющаго и мнящих себе́ пра́ведники бы́ти отвергающаго, да славосло́вим ве́чно во блаже́нстве ве́чнем Тебе́, Еди́наго И́стиннаго Бо́га, плене́нных Искупи́теля, поги́бших Спаси́теля.