Молитва первая, святого Ефрема Сирина

О Дево Владычице Богородице, Творца и Господа видимых всех и невидимых, Единаго от Троицы, Бога же и Человека рождшая! Обиталище Божие, вместилище святыни и благодати, в не́мже, благоволением Бога Отца и содействием Святаго Духа, теле́сне вселися полнота Божества! Всякое создание высотою превосходящая! Славо и утешение, радость и веселие Ангелов! Апостолов и пророков царственный ве́нче; преестественная крепосте мучеников; ублажение и хвало преподобных, споборнице в их подвизех и побед подательнице; непрелестная путеводительнице спасения, безмолвия наставнице, две́ре откровений и тайн духовных; источниче света, врата жизни вечныя; неистощимая реке́ милосердия, море дарований и чудес неисчерпаемое!..

Яко Матерь Человеколюбиваго Владыки, зеле́ всем состраждущую, умоляю Тя: милостива буди мне, уничиженному и недостойному рабу Твоему (или рабе, – аще жена молящаяся); преклонися к смирению моему; разжени́ видимых и невидимых врагов моих, стани за мя непотребнаго пред лице́м их, я́ко возбранное оружие, крепкое защищение, необоримая поборница.

О Владычице, Благаго, Всеблагаго и Преблагаго Бога Мати! Милостивно призри на молитву недостои́наго раба Твоего и яви́ неизреченное Твое на мне милосердие, презревши прегрешения моя, я́же соверших словом или делом, моим ли произволением или за немощь воли, ведением или неведением. И всего обнови мя; Всесвятому и Животворящему Духу, Иже есть сила Вышняго, прежде всех утробу Твою осенивыи́ и в ней обитавыи́. Тому храм и мя сотвори. И тако да познают вси, верующии́ же и беззаконнии, яко вся, ели́ка восхощеши, возможна суть Тебе, Владычице, е́ще на небеси или на земли: Ты бо еси воистину Богородица, истиннаго Бога во плоти порождшая, Мати единаго Царя и Владыки всяческих, Емуже подобает всякая честь и поклонение во веки веков. Аминь.

Молитва вторая

О Мати Божия, всякаго разумения высшая! О Дево, всякое девство превосшедшая: я́ко Дева, прежде рождества Воплотившагося от Тебе, па́че всех дев была еси; и в рождестве и по рождестве паки Дева пребыла еси! О Владычице Богородице, Христа Спасителя и Господа нашего во чреве Твоем несказанно носившая и Бога во плоти непостижно родившая! О Пречистая Отрокови́це! Тобою естество человеческое, от Бога некогда отсту́плынее, па́ки, неизреченнаго Его ради человеколюбия, с естеством Божественным соединися, ни слияния, ниже́ пременения во ипоста́сех претерпевши. О Мати и Дево! И примирившеся с Богом, Тобою милостива Сына Твоего и Господа нашего паки обретаем, егда́, завистию лукаваго, должная не творим.

Сего ради и аз, недостои́ный и многогрешный, оба́че милость получивый быти верен (верна, – аще жена) Спасителю моему и Богу, и благодатию во Святем Крещении одеянный, дерзаю принести Тебе от всего сердца сей глас молебный. Тя, Владычице, прошу; Тебе, милостивую и человеколюбивую Матерь Милосердаго и Человеколюбиваго Бога, умоляю: не отри́ни, Госпоже, смиреннаго моления моего. Буди ми избавительница: на Тя бо всю надежду мою возлагаю, на Тя уповаю. Своею Божественною благодатию покрый мя, Пречистая. И путево́дствуй по воли святей Сына Твоего и Бога всею жизнью моей. Отпущение грехов мне испроси; прибежище, покров, защищение зде, и в жизнь вечную руководительница буди. В страшный же час смертный не остави мене́, Владычице; но потщися на помощь и от рук бесо́в мучающих исторгни мя: можеши бо, яко сущая Мати Бога, вся сия совершити. И на праведнем Судищи неосужденна молитвами Твоими сохрани мя; яко, да спасе́н благодатию Твоею, прославлю Тя и восхвалю Всеблагую Троицу во веки веков. Аминь.

Молитва третья

Пресвятая Владычице Богородице, душе́ю и телом единая то́кмо чистая, едина всякое целомудрие и девство превозшедшая; едина обитель полноты благодати Всесвятаго Духа явльшаяся!

Не отрини мене недостоинаго, нечистаго, душу и тело сластолюбивым житием моим осквернившаго. Очисти мой ум от влечения ко страстям; блуждающия и омраченныя помыслы мои к непорочным стремлениям обрати; всем движениям души руководительница буди; от об держащаго мя злаго и срамнаго уклонения к пожеланиям и порокам освободи; ослаби угнетающий мя грех и окаянному слепотствующему уму моему трезвение и разсуждение даруй; яко да, изба́влься от тьмы греховныя, сподоблюся прославляти Тя, истинную Матерь истиннаго Света, Христа Бога нашего: Тя бо едину с Ним и Его ради благословят видимыя и невидимыя твари, ныне и присно, и во веки веков. Аминь.

Молитва четвертая

Дево Владычице, Благодатная Богородительнице, Преблагословенная, Богообрадованная, Вместилище Божества, Единороднаго Сына Безсмертнаго Мати и Незримаго Отца Дщерь!

Приклони ухо Твое мне и внемли́ словам сим, скверными и нечистыми усты моими глаголемым: с сердцем сокрушенным и смиренными помышленьми прибегаю к благоутробию Твоему. Не пренебрези мене жалости достойнаго; не попусти погибнути ми, непотребному рабу Твоему. Исцели окаянную душу мою, злыми страстьми одержимую: се бо враг попра́ ю, грехми сластолюбия сокрушив; и сам аз храм телесный оскверних, непристойными похоте́ниями окаля́х, и вся чувствия моя делы́ немыслимыми растли́х. И уже не дерзаю вознести к небу ру́це мои, сту́дными деяньми опрокаже́нныя. На молитвы еще отверзаю уста; но и сия злоречием и осуждением ближних опоро́чена суть. Сердцем воздохнути хотел бых; оба́че срамныя нечистоты пригнетают е. И горестно и студно ми есть! И уже не смею просити множеству грехов моих прощения и неизлечимых язв исцеления от Человеколюбиваго и без числа миловавшаго Бога моего. Сего ради к Твоим щедротам припа́даю в прахе, злосчастный и заблуждший: разве бо Тебе ина́го упования, инаго прибежища не и́мам. Ты еси единое мое утешение, радость души моея, избавление скорбей, искупление от плена страстей, возстание падших, обновление души и тела, лучезарный светильник духа моего, освящение оскверненных, облагодатствование кающихся, обожествление смертных, прикровение наготы моея, рыданий моих прекращение, горестнаго жребия моего пременение. На Тя – вся моя надежда!

Не лиши мя предстательства Твоего, но помогай ми и покрывай пред лицем Сына Твоего: моления бо Твои приятны суть Ему, ибо благоволивый зрак³ раба от Тебе восприяти всегда хранит милость Свою к Тебе, неизреченным рождением Ему послужившей. Па́че же и радуется Он ходатайствам Твоим и благою волею исполняет их, славу Тебе яко Себе Самому вменяя. Токмо Ты убо не презри мне окаяннаго, да не прекратит безобразие зол моих еще и Твоея милости: яко иныя помощи, креплыпия Тебе, воистину нигдеже вем и не зрю. Сего ради аще и повинен есмь во множестве прегрешений; обаче в покаянии к Тебе, скорой помощнице в ско́рбех притекаю и из глубины сердца вопию: помилуй мя, всяких грехов и разслабления исполненнаго; приими убогое моление сие от безпомощныя души моея; услыши вопль бо-лезнующаго сердца моего. И молитвами Твоими не отвержена сотвори мя от Сына Твоего и Бога, грешников Спасителя; еще же и Царствия Небеснаго причастника быти сподоби, вое́же в благодарении славословити Единаго в Троице Бога, и ныне, и присно, и во веки веков. Аминь.

Молитва пятая

О Дево Владычице, Господа моего Иисуса Христа Мати! Вем, яко и нечист и осквернен, и непотребен есмь: всяку бо меру превзыдо́ша, паче числа песка морскаго умножишася беззакония моя. Обаче к Тебе прибегаю, покаяние принося и грехи моя исповедуя: прости мя, Владычице! Помилуй мя, человеколюбно всех милующая! Не отврати лица Твоего от мене! Да не возрадуются врази мои! Но на большее покаяние возбуди дух мой и на путь спасения направи мя; да паки возвратився на него, Твоею помощию надежно спасуся, Тебе сопутнице мне сущей. О Владычице, Человеколюбиваго Бога Мати! Смири мое сердце и исполни его сокрушением; даждь очам моим сле́зы и светом молитв Твоих просвети их; окропи и очисти мя иссо́пом милосердия Твоего; и моими слезами по благодати Твоей омый мя. О Мати Господа моего Иисуса Христа! Приими смиренное испове́дание сие и моление мое; сохрани в покаянии прочее время живота моего. Во время же исхода души моея от телесе воззри на мя милосердно; заступница моя буди и рукописание грехов раздери. И тако спасенна мя приведи к Престолу Сына Твоего и Собезначальнаго Его Отца, и Всесвятаго Духа, Светоначальныя и Единосущныя Троицы, Ейже подобает всякая слава, честь и поклонение во век и в век века. Аминь.

Молитва шестая

О Дево Владычице Богородице! Вем, яко недостоин есмь и взирати на образ Твой; Ты бо душе́ю и телом пречиста еси, и воистину праведно Ти есть возгнушатися мною, отовсюду отверженным. Но поне́же рожденный Тобою Бог того ради Человек бысть, да грешники призовет к покаянию; и Ты убо приими испове́дание множества тяжких грехов моих и умоли Сына Своего и Бога, да явит Он милость Свою и бедней души моей; великое бо множество обеззаконий моих недостойна мя творит, вое́же возвести к Нему очи мои и самому просити прощения от Него: яко многими дарми от создавшаго мя Бога насладився, вся сия забых, неблагодарный; и ныне нищ есмь добродетельми, страстьми же сый богат; в самем себе весьма срамля́юся и осуждаюся от Бога, обличает мя совесть, постыждают деяния. Слезят надо мною Ангели, посмеваются демони. Прежде смерти мертвец аз есмь; прежде суда осужде́н; прежде безконечныя муки отчаянием терзаем есмь!

Сего ради к Твоей, о Владычице Богородице, скорой помощи притекаю: преклонися к недостоинству моему, Пречистая; яви́ жалость мне безпомощному, Непорочная: великое бо ймаши к Рожденному Тобою дерзновение, яковаго никтоже иньш отнюдь и́мать. Ты, яко Мати Божия, вся можеши! Ничтоже невозможно Ти есть, е́ще то́кмо восхо́щеши! Не презри у́бо воздыханий, слез и рыданий моих; не отрини скорби и утеснений сердца моего; не тщетну остави надежду на Тя! Но молением Твоим милосердие Сына Твоего ко мне приклони; и сподоби мя, горестнаго и недостойнаго раба Твоего, паки восприяти первую красоту духовную, совлещи́ же с себе безобразие ю страстей, из ко́рене исторгнути сластолюбие, приклонитися же к правде, во святыню безстрастия облещи́ся, умрети миру греховному и к жизни добродетельней воскреснути. И по сем не остави мене, немощнаго, Владычице, но буди ми спутница, на земли странствующему, и плавающаго по морю житейскому окормляй мя; бодрствующа укрепляй и спяща охраняй; оскорбляемаго избавляй, оклеветуема защищай; падающа удержи, изнемогшаго возстави и паки утверди; воюющих на мя бесо́в победи и от смертныя напасти свободи, врагом видимым и невидимым страшна мя на всякий час показующи: да известно познают ти́и, я́ко аз раб Твой, Богомати, Бога и Царя всех рождшая, Емуже подобает честь и поклонение во веки веков. Аминь.

Молитва седьмая

Се умоляю Тя, Родительница невечерняго Света: внемли́, ели́ка хощу́ поведати Ти!

В тину погружаюся аз, окаянный! Землю множеством грехов оскверних! Се вижу: стенает земля от мене, с воздыханиями показует мя Судии; во свидетели солнце и небо с звезда́ми призывает!

Буря помышлений моих в отчаяние мя погружает! С трепетом приговора душа ожидает! Страшное чудо! Воистину страшное! Ка́ко еще́ грехи мои терпел есть Господь?! Како не све́л еще́ мя жйва во дно адово?! Како и свыше не посла невидимаго оружия поразити мя, всю жизнь осквернившаго?!

Верую, яко несумненно Ты, Владычице, мольбами Своими жизнь исходатаила еси мне, надежду имущи на мое покаяние. И се ныне, о Богородице, токмо на Тя – все мое упование! Аще и стыда лице Твоего служителя исполнена есть, оба́че к Тебе прибегаю с мольбою. Ты же, о Мати, и Сама Рожденнаго Тобою всегда умолявши: да подаст Он и мне, недостойному, едину крупицу от щедрот Своих. Разреши нерешимыя узы моя! Яже жизнь мою Христа рождшая, воскреси мя, нерадением умерщвленнаго! Слезами покаяния убели мя, страстьми очернённаго! Сокрушение сердечное, рыдания и сле́зы Сама подаждь ми, Владычице! Яко Жена, во чреве имевшая Воплотившагося на спасение наше Бога, даруй ми совершенное грехов оставление! Отчуждённаго мя от Ангелов, паки возведи к ним, Богородице! И Сама светом Божественнаго лица Твоего озари, яко да и во дни и в нощи́ восклицаю Ти песнопения. Сподоби мя и ныне и в о́ный день у́мныма очи́ма у́зрети Тя, Пречистая, да обрадован буду Тобою аз немощный и унылый.

О при́стане моя и оградо! О крепосте моя и надеждо! О сладкий свете и утешение рабу Твоему! О Пастырнице, и прокаженныя овцы Твоея не отрекающаяся! О целительнице, гнойных язв простирающаго к Тебе разслабленныя руки не гнушающаяся! О скоропослушная Мати мира, милосердно внемлющая горьким стенаниям и слёзным молениям оскверне́нных уст раба Твоего! И на сей час прошение мое приими! Нощь жизни сей да будет ми день спасения Тобою, Богоневестная!

Воистину бо вем, елйка аще восхотела бы еси, вся пред лицем Рожденнаго Тобою возможеши; Емуже пе́ту быти подобает гласы преподобными. Оба́че и аз, отчаянный, но Тобою покрываемый, от всея́ души моея приношу Ему честь и поклонение ныне и во веки веков. Аминь.

Молитва восьмая

Ве́си, Владычице, яко несть во мне от дел моих спасения надежды; ибо волею своею растли́х душу и тело мое; от юности непотребен сосуд и негоден обрето́хся; вслед диавола во всем и до́х, окаянный: и в помышлениях моих и деяниих. Временем многим навыкновение ко грехом приобретох. И разве токмо на малый час во уме моем помраче́нием свет покаяния озаряет. И тогда страшную клятву Сыну Твоему и Богу от всего сердца даю, вопия́: прости ми, Владыко, прегрешения моя: отселе престаю́ аз грешити пред Тобою!

Но, о долготерпения Бога моего, Христа Жизнодавца! Како терпит токмо Сын Твой, Владычице, зря непрестающее клятвопреступление и ложь, имже несть конца во мне, окаяннем?! О, каково безстрашие мое! Коль велико презо́рство⁴! Еще́ бо обещанию су́щу во устёх моих, уже паки делом от него отрекаюся: лучшаго желая, к худшему и большему, паче прежняго, греху стремлюся, несытый! И тако в нечувствие всегда себе привожу, и яко сви́ния омывшаяся, паки в кал гнойный возвращаюся.

И что сотворю, о Владычице? Ты помози мне, Пречистая! Не попусти ми достояние лукавому до конца быти! Но аще и ослабевша, аще и противу воли моея, сотвори мя раба Сыну Твоему и сосуд потребный Духу Всесвятому. А еже како сие будет, Сама Ты ве́си и волиши. Токмо спаси мя; и дар подаждь ми, да прославлю Тя от всего сердца и от всея души моея, восклицая Тебе сице:

Радуйся, песне Херувимов и Ангелов гимне! Радуйся, мире и рад осте человеков! Радуйся раю́ сладостей! Радуйся, древо жизни! Радуйся, стене́ верных и бедствующим пристанище! Радуйся, Адамово воззвание! Радуйся, Евы искупление! Радуйся, благодати и безсмертия источниче! Радуйся, Святаго Духа сосуде запечатленный! Радуйся, храме Божества! Радуйся, Господень Престоле! Радуйся, Непорочная, главу змия сокрушившая! Радуйся, прибежище тя́жце измученных! Радуйся, искупление клятвы! Радуйся, через Рожденнаго от Тебе миру радость явившая! Радуйся, Мати Христа, Сына Бога Живаго! Емуже подобает слава, честь и поклонение, ныне и присно, и во веки веков. Аминь.

Молитва девятая

Род человеческий Ходатаицу к Рождшемуся от Тебе Богу обре́те Тя, Богородице: в Тебе бо и предстательстве Твоем и́мут вси заступление, яко дерзновение стяжала еси к Сыну Твоему. Сего ради и аз пламенным сердцем к Тебе притекаю: не дерзая бо к Нему несредственне приступити, Тя о спасении умоляю, да посредничеством Твоим и аз узрю Его. Внемли́ рабу Твоему, всю надежду по Бозе на Тя возложившему! Помилуй служителя Твоего, Человеколюбиваго и Милосерднаго Бога Мати! Избави мя, совестию осужденнаго! Зной сластолюбия угаси во мне, воспламени же любовь к Сыну и Богу Твоему! От непристойных пожеланий чувства моя огради! Се умоляю Тя: да дастся ми время на покаяние! Да не поразит мя смерть еще неготоваго! Да не буду ввержен во огнь негасимый, яко никогдаже добраго плода приносящий! Но возжги паки светильник души моея; мрак скорбей моих разженй; мглу страстей моих развей молитвами Твоими; даждь ми свет покаяния; к сокрушению направи; прочие дни живота моего сподоби во благоугождении Человеколюбцу Богу препроводити. Ели́ко еще» жизни сей пребываю, покрывай и сохраняй мя; в скитаниих моих сшествуй ми; ко граду небесному углади все пути моя. Егда же предстанет конец мой, явися, Владычице, на помощь: утоли болезни, облегчи мучения; и в вечныя обители путь укажи бедней души моей и тамо препроводи ю; да не одолеют мя темныя силы и увлекут во дно адово. Ни! Но да увижду и аз Судию милостива! И Тобою от вечнаго пламени избавлься, райским утешением в Троице наслаждуся и Небесное Царство восприиму.

В жизни же сей отжени́ от мене, смиреннаго раба Твоего, уныние, забвение, неразумие, нерадение, тщеславие, блуд, прелюбодея́ние, чревоугодие, самолюбие, нетерпение и вся лукавыя помыслы окаяннаго сердца и помраченнаго ума моего. И избави мя от многих лютых предприятий, яко немощен есмь. Аз же, Тобою хранимый, возвеличу и прославлю Тя, яко Заступницу рода человеческаго; Тя бо вси язьщы ублажают, Дево Владычице Богородице, упование всех христиан и паче всех смертных препрославленная, яко Мати еси Христа Бога нашего; Емуже подобает всякая честь и поклонение во веки веков. Аминь.

Молитва десятая

Милостивая Мати Человеколюбнаго и Милостиваго Бога! Услыши мя с высоты славы Твоея; да внидут в уши Твои словеса́ моя; внемли́ воплю моему, из глубины души исторгающемуся; и скорбнаго моления моего не отвержи! Ходатайством Твоим жизнь мне сохраняющи, повели отверсти уста моя, да еще прежде кончины возмогу испове́дати величие Твое.

Согреших аз, Всенепорочная, согреших; и беззакония моя вем, и грехи мои предо мною всегда суть. Но и еще возблаговоли на последнее прошение мое и исповедание раба Твоего: даждь ми источники сле́з и очисти ими тину грехов моих; всели благоговейный страх к Сыну Твоему и Богу; и внутрь души моея снизойди, да очищуся слезами и да возсозиждется во мне дух спасения. Возжги свет духовный в помраченней души моей; да в тишине и чистоте его сияния вознесу жертву, по заповеди Сына Твоего и Бога моего, грешных, а не праведных призвати к покаянию пришедшаго; да приимет Он ходатайством Твоим и мене недостойнаго. Аще бо и мнози от века быша согрешивший, Владычице; мнози во вся времена не сохраниша заповедей Сына Твоего; но ни единаго же несть, егоже не превзыдо́х мерою беззаконий. Вся Писания, Ветхая же и Новая, славят подвиги праведных; мене же обличает внутрь сущий суд совести, яко грехи и беззакония моя превзыдо́ша всех злых от века: Адам, прияв заповедь и закон, не соблюде́ их; оба́че той, Пречистая, никаковаго падения и осуждения прежде не веде. Что же реку́ аз, окаянный, в мое оправдание? Неудержим есмь и самоволен, аз сам прилежах вся злая творити. И ныне несть ми извинения! Окаяннейший есмь всех сынов Адамлих; беднейший содомлян, огне́м поглоще́нных.

Воистину помышляю себе несчастнейша всех несчастных и паче всех грешников в Ветхом и Новом Завете сущих грешнейша.

Крестився, аз паки сквернюся; восприятием благодати украшенный, в греховную срамоту облекаюся; и тако изнищева́ю благодать, в Крещении ми данную. И удовлеет ли ми помышлений и разума, времени и путей, имиже очистил бых грехи моя, якоже море многия сущия? И что будет ми? Камо пойду? Небесная стезя – неприступна мне; узок путь земный; подземная врата страшна суть; отовсюду в неизобразимей беде су́ща мя ви́жду; опасности неизбежныя везде стерегут мя! Мысль и слово мое изсякают…

Но, о многомощная Мати Всемогущаго Бога! Даждь ми руку помощи безпомощному! Воздвигни смятенную душу мою, рекши ей: Аз есмь спасение твое!

Внемли сей мольбе моей и из бездны скорбей исторгни мя! Аз же прославлю Тя, Преблагословенная Мати Христа Бога нашего, Емуже подобает честь и поклонение во веки веков. Аминь.

Молитва одиннадцатая

Пресвятая Владычице Богородице! Услыши моление мое и исполни е; на Тя бо, над еж до всех конце́в земли, уповаю.

Угаси пламень телесе́ моего. Укроти бурю гнева. До конца истреби суетное превозношение тщеславныя юности моея. Ослаби лукавая мечтания сердца, от злых духов наводимая. Изсуши непрестанно находящий поток нечистых помыслов, искушающих мя.

Научи язык мой глаголати токмо полезная, очи мои зрети ед ину красоту святыни. Отверзи уши мои, да возмогу насыщатися сладчайшими меда вещаниями Святаго Писания и творити я Твоею помощию. Очисти уста моя, да сподоблюся Вышняго Бога Отцем моим именовати. Даруй ми время покания и от внезапныя кончины избави мя. Очисти и омый от всякия скверны плоти и духа. Даждь рабу Твоему сердце сокрушенное, умирение помыслов, уму целомудрие, трезвение души, смирение в мыслех, правый дух, житие благоразсудное, еще же и мир, егоже дарова Господь наш учеником Своим. В тишине неволнуемей сохрани мя; отрадою несказанною и непрестающею радостью возрадуй мя; яко да пока́явся, шествую правым путе́м заповедей Сына Твоего, и прочее поприще жизни моея прейду уже непоносим судом совести моея. Даждь ми, ныне молящемуся Тебе, чистую молитву; да достойно славословлю Тя даже до самыя смерти вся дни спасительнаго подвига моего. По кончине же от злобных истязаний воздушных мытарей освободи мя.

Тебе, о Владычице Богородице, свете омраче́нных очей моих, утешение души моея, надеждо и спасение мое, приношу сия моления.

По сих же и еще о единем молю Тя, Путеводительнице моя Преблагая: сподоби мя, покаявшагося и о гресех сокрушающагося, неосужденно, аще и всячески недостоин есмь, причащатися Пречистыя Крове и Тела Сына и Бога Твоего, во спасение души и исцеление тела и в залог вечныя жизни. В будущем же веце сладости Небесныя Ве́чери причащатися и райских неизреченных благодатей Божия Царства удостой. Аз же, приятия сих благ сподо́бився, во век века воспрославлю Сына и Бога Твоего со Безначальным Его Отцем и Животворящим Духом, якоже и ныне, такожде и присно, и в безконечные веки. Аминь.

Молитва двенадцатая

О Дево Владычице Богородице, Христа Спаса нашего и Бога во чреве носившая! На Тя всю надежду мою возлагаю, на Тя уповаю: Ты бо и безплотных Сил превысит еси. Огради мя, Пречистая, Божественною Своею благодатию. Путеводствуй в жизни моей, по воле Сына Твоего и Бога нашего направляющи. Даруй ми отпущение грехов; буди прибежище, покров, защищение и окормительница в жизнь вечную.

Ты едина, Владычице Богородице, над всею земле́ю превознесенна еси! Аз же, Богоневестная, с верою благословляю Тя, с любовию величаю и со страхом поклоняюся Тебе: Ты бо хвала всех похвал и всех высот вершина еси…

О Владычице, Богом дарованная ми отрадо, Божественное прохлаждение сущаго внутрь мене зноя; стру́е, источник сле́з моих исторгшая; лучезарный светоче души моея; богатство в нищете моей; сила в немощех; него исцельных язв исцеление; конец рыданием, разрешение уз! Внемли молитвенным воздыханиям моим, умилосердися воплю моему; и на сле́зы моя призревши, к прошению моему преклонися; яко Мати Человеколюбца Бога, яви ми милость Свою. Утоли неутолимыя похотения мои: свободи мя от терзающих мя страстей, умерщвляющих душу мою; и на земли живых, в лоне праведных возсоедини мя с Собою. О общая всех радосте, общее всем предстательнице, умоляю Тя: сподоби мя возвеселитися оною радостию неизреченною, яже в Рождением Тобою Царе и Боге, в неоказанием Его чертозе, в непрестающем услаждении, в нескончаемом Царстве Его сияет. О Владычице моя, прибежище мое, жизнь моя, оружие, похвало, упование и сило моя! Даруй ми наслаждатися неизреченными благодатьми Сына Твоего. Сего прошу от Тебе: Ты бо, яко Всевышняго Мати, подобную Ему, аще изволиши, и́маши силу. Того ради уповаю, яко прииму от Тебе, егоже ча́ю, о Богоневестная, рождшая всех Надежду, Господа нашего Иисуса Христа; Емуже подобает всякая слава, честь и поклонение со Безначальным Его Отцем, Благим и Животворящим Духом, ныне и присно, и во веки веков. Аминь.

Молитва тринадцатая

О Дево Владычице, Пречистая Богородице, Всеславная Госпоже моя! Высшая небес и чистшая светлостей солнечных! Честнейшая Херувим и Славнейшая всех Сил небесных! Апостолов похвало́ и мучеников крепосте! Радование преподобных, осияние подвизающихся! Златая кадильнице, светильниче светоносный! Купино́ неопалимая, Божественнейший законе, истинный кивоте, жезле Ааронов процветший: воистину бо жезл еси, от негоже истинный Плод, Сын Твой Христос, прозябе́! Ты плотию Бога Слова родила еси; но и по рождестве, якоже прежде рождества, пребывавши Дева. Тобою во Христе, Сыне Твоем, с Богом Отцем примирихомся. Ты грешным и беспомощным помощница еси; Ты еси утешение мира; сирот хранительница; пленных искупление; монашествующих укрепление; упование мирских человек; Ты вдовам терпение, покров и защищение еси; похвала, радость и венец девствующим.

О Честна́я Владычице и Госпоже! Укрый и охрани мя, да не превозносится лукавый враг надо мною: Ты бо, Пренепорочная, помощь моя еси; и инаго прибежища, кроме Тебе, не знаю. Со слезами молю Тя, Владычице, да не осудит мя Сын Твой и Создатель мой, по множеству содеянных мною грехов, в вечныя муки. Умоляю Тя, да сподоблюся и аз ходатайством Твоим во обители святых вни́ти, иде́же несть сле́з, ни скорбей, ниже́ смерти, ни мук, но радость непрестающая, наслаждение праведных, жизнь безконечная, утешение и слава.

Исполни уста моя благодатию Твоею; возбуди язык мой от радостныя души и теплаго сердца славословити Тя; даждь и мне силу воззвати Ти ангельское хваление, еже Ти Гавриил изрече́: Радуйся, Благодатная, Господь с Тобою!

Сподоби, о Дево, смиреннаго раба Твоего, избавитися ми от грехов и страстей. Разжени помыслы, яже от диавола мне прибывающия, и вое́же в преисподняя душу мою низрину ти, от него насылаемыя. Страх Божий и любовь даруй ми, о Дево. И жизнь непорочную подаждь ми; теплоту веры ко Господу и милость к ближним даруй; посли ми терпение, смирение, воздержание и пощение, сокрушенныя слезы, память вечных мук и от всех злых отвращение; яко да сподоблюся и аз внити в чертог Сына Твоего и Бога, и тамо со всеми святыми прославити великолепое имя Пресвятыя Троицы во веки веков. Аминь.

Молитва четырнадцатая

О Всепетая Владычице, источниче милосердия, бездно человеколюбия, водо живая, предстательнице грешных, истинная виноградная лозо́, небесное блаженство, общее всех прибежище, жизнь всего мира!

Суетному, мятущемуся и прелюбодейному миру продав себе до конца, обаче безпечален в деяниих и помыслех аз пребываю, и в небрежении житие провожду. Но, яко состраждущая Мати Божия, не возгнушайся мною, грешным; моление же сие, аще и осквернен – ными устами Тебе приносимое, приими; и милостива Судию благоприятными Твоими молитвами соделай. Умоли Сына Твоего, да пре́зрит вся грехи моя. К покаянию ум мой направи. Не попусти, да буду сатане достояние!

Паче же ходатайством Твоим обнови мя и исправи жизнь мою; яко да возмогу без страха предстати Судии и о́наго ужаснаго мучения избежати. Сотвори же мя наследника славы, молящи о сем Сына Твоего и Создателя моего, Емуже подобает слава, честь и поклонение во веки веков. Аминь.

Молитва пятнадцатая

О Пресвятая Владычице Богородице! Радосте отягощенных, предстательство обидимых, помоще безпомощным, сило немощных, жезле слепотствующих, спасительный кормчию заблуждающим; освяще́нный ковчеже, имже от потопа греховнаго спасаемся; купине́ неопалимая, юже Моисей Боговидец зряше; златая кадильнице, из нея́же Слово, плоть Себе возжегши, благоуханием вселенную исполни; седмосве́щный светильниче, паче сияния солнечнаго возсиявый; ски́ние святая; ста́мно, Манну Христа вместившая; жезле Ааронов прозябший; руне́ Гедеоново; Богописанная книго, еяже ради рукописа́ние Адамово раздра́ся; горе́ Божия, в нейже Господь обитати благоволи; прекрасная по естеству, никиим же укоризнам надлежащая; вся непорочная; полноту Божества, Сына Отчаго, в Себе вместившая; Иезекии́лева врата, на восток зрящая; клеще огненная, ю́же Исаия ви́де; горб Даниилова несеко́мая; вершино Авваку́мова, добродетельми приосене́нная; преукрашенное вместилище Божия снисхождения; примирение мира; раю́ святейший, во Едеме насажденный; древо живоносное, розо благоуханная, цвете неувядаемый, чистейшая лилие; образе девства, без красок начертанный; боготканная порфиро; яснейшее всех пророчеств исполнение; немо́лчная уста апостольская; крепкое основание подвижников необоримых; царей утверждение, иереев похвало; прегрешений прощение, неумытнаго⁶ Судии умилостивление; души моей и тела обновление; спасение мое, жизнь моя, свет мой, упование мое, отрада моя, прибежище мое; покро́ве, сило, веселие и сладосте моя; стено́, ограждение, оружие, защито моя; славо, тишино, мире, песне моя, радосте, благословение, якорю, богатство, росо, святыне моя; печалей избавление, души моея просвещение и освящение; грехов искупление, упокоение в Бозе; воздержание, непорочносте, мужество, целомудрие, свободо, пристанище, сокровище, высото, крепосте, красото, благоразумие мое; вечное наследие мое; в покаянии утверждение, неусыпное мое пред Богом предстательство!

Ты зриши веру мою и любовь к Тебе восхище́нную; ихже ради, паче же яко Мати Милосерднаго Бога, сострадательна и мощна суща, приими несчастнейшую душу мою. И сподоби ю Твоим заступлением одесну́ю стати Сына Твоего и Бога, и упокоение со избранными и святыми Его получити. Ей, не лиши мя сего предстательства Твоего, имаши бо Его, яко должника Твоего, от Тебе плоть взаим вземшаго и рекшаго: чти отца твоего и матерь твою.

Се на Тя себе возлагаю надежно: Ты бо воистину родила еси во плоти Бога истиннаго; Емуже подобает всякая слава, честь и поклонение со Безначальным Его Отцем, Пресвятым и Благим и Животворящим Духом, ныне и присно, и во веки веков. Аминь.

Молитва шестнадцатая

Пресвятая Владычице Богородице, Благодатная Богородительнице, Преблагословенная Богоблагодатная Мати, Божества приятелище, Единороднаго Сына Безсмертнаго и Отца Незримаго огнеобразный престо́ле; Всенепорочная, Всепречистая, Всепетая, Всеблаженнейшая, Всенеприкосновенная, Всечестна́я, Всеублажаемая, Всеблагословенная, Всевожделенная Дево душо́ю и духом, такожде и телом; престоле Царя, на Херувимех седящаго; врата небесная, имиже на небо и мы восходим; Богоневестно, еюже с Богом примирение прииде нам; непостижимое чудо, неуразумеваемое известие; откровение Божия тайны сокровенныя; непобедимое предстательство, крепкое защищение; живоносный источниче, море неисчерпаемое дарований Божественных; высото, небесныя Силы превосходящая; глубино таинственных мыслей неизследимая; общая по Троице всех Владычице; всем, по Уте́шителе Дусе Святем, Уте́шительнице; за весь мир, по Единем Ходатае Христе Спасе, Ходатаице; колеснице мысленнаго Солнца, истиннаго Света, просвещающаго всякаго человека, грядущаго в мир; носящаго всяческая словом Своим носящая; мо́сте вселенныя, к премирному небу преводящий; Херувимов и Серафимов высшая и без сравнения славнейшая; Ангелов украшение, человеком спасение; Мати и рабо́ звезды незаходимыя; неизреченнаго человеколюбия Божия без дно; тве́рдое основание правыя веры; молние, души озаряющая; охранение на высоту восшедших, надеждо во глубину зол падших; крепосте бодрствующих, возбуждение ленивых; Церквей единомыслие, царств благоустроение; мире всея вселенныя; небесе и земли Царице!

Тобою хвалюся! На Тя надеюся! Тя прославляю! Не и́мам бо иныя кроме́ Тебе помощи и защищения. Да не буду безплоден в молениях к Тебе: и́маши бо силу, яко Единаго от Троицы неизреченно родившая; имаши, о чесо́м можеши умолити Его и умилостивити: се бо – руце Твои, имиже носила Его, Ему покажи; се – сосцы Твоя, имиже яко Младенца питала еси Его! К сим же, яже от Тебе суть, привлецы́ еще́ и я́же Он и́мать: крест, кровь, язвы, имиже мы спасаемся и хвалимся.

Вем, яко присно угодная творит Тебе, рождеством Ему на искупление мира послужившей. И се, исполнен мир весь благодеяньми Твоими. Ты всяку слезу от лица земли утолявши. Ты небесных возвеселявши и спасавши земных. Ты Творца умилостивлявши, Ты Ангелов и человек примирила еси; падших на высоту возвела еси. Тобою вся на лучшая премени́шася, и паче прежних в совершеннейшая всяческая преложишася. В Тебе и нашего воскресения зна́мение неложное и́мамы. Тобою Царство Небесное получити уповаем. Ты еси дарованная нам помощница спасения. Ты в рай вход отверзла еси нам. Ты восход к небу облегчила еси. Ты нас Сыну и Богу Твоему присвоила еси.

И Тобою, Пречистая, от Адама и до скончания века бе, есть и будет слава и честь апостолом, пророком, мучеником, преподобным! О Тебе, Благодатная, радуется всякая тварь, Тобою спасающися, и за Тя и через Тебе прославляющи Единаго в Троице Бога во веки веков. Аминь.

Молитва семнадцатая

Восхваляю и прославляю Тя, Владычице Богородице, мира Предстательнице, всех Заступнице, моя Путеводительнице! Прости ми, Всенепорочная, леность мою и безчувствие к делом спасительным. Сама исполни уста мои и сердце вдохновения, да непрестанно Тебе и Человеколюбивому Сыну Твоему и Богу приноша́ю от всея души моея песнопения; ибо милостию благодати еще жив есмь доселе; и мно́жицею, окаянный, спасахся и спасаюся от всяких напастей, болезней и бед, душевных вку́пе и телесных. И паки надежду непогрешительную и в прочем житии моем и в жизни вечней имам на Тя. Сего ради, много милованный и милуемый по милости Твоей, от пламеннаго сердца и восхищенныя души восклицаю; и благодарственную хвалебную песнь, грешный раб Твой, Пресвятая Мати Человеколюбиваго Бога, радостно возношу Ти: Радуйся, Благодатная Марие, Господь с Тобою! Радуйся, Богородице, Тобою бо  с нами! Радуйся, Всенепорочная и Благословенная! Радуйся, Дево, человеков славо! Радуйся, печате завета Господня! Радуйся, обновление обветшавших! Радуйся, соединение древле разстоящих! Радуйся, Рабб Господня! Радуйся, престоле Самаго Бога! Радуйся, Пречистая Дево и Мати! Радуйся, умилостивительная жертво заблу ж дающих! Радуйся, Божественный даре миру! Радуйся, Мати Божия! Радуйся, всея вселенныя Владычице! Радуйся, всех созданий высшая! Радуйся Бога Слова рождшая! Радуйся, радосте и славословие Ангелов! Радуйся, спасение верных! Радуйся, грехов моих разрешение! Радуйся, бедствующих утешение! Радуйся, мечу́ на бесов лукавых! Радуйся, в роды родов ублажаемая! Радуйся, нищим помоще богатая! Радуйся, скорое утешение скорбящих! Радуйся, озарение во мраке блудящих! Радуйся, немудрых премудрое разсуждение! Радуйся, в нуждах помощнице! Радуйся, страстных уте́шительнице! Радуйся, плавающих пристанище! Радуйся, странников путеводительнице! Радуйся, десни́це крепко стоящих! Радуйся, на руки Твоя приемлющая падающих! Радуйся, стене́ Тя призывающих! Радуйся, предваряющая маловерных! Радуйся, источниче всяких благ жизни! Радуйся, избавление вечныя муки! Радуйся, всем защите крепкая и покре́ве! Радуйся, Благословенная, во веки веков! Радуйся, Заступнице усердная рода христианскаго! Радуйся, Божия Невесте Неневестная! Аминь.

Молитва восемнадцатая, схииеромонаха Киевского отца Парфения

Возлюбленная Богу Отцу Дщерь, безмужная Еммануила Мати, кристалловидная Паракли́та (Уте́шителя) Невесте, и всякия святыни вместилище! Радоватися Тебе о Господе!

О Святоглаголивая Горлице, высшая небес Владычице и чистшая светлостей солнечных, белолилейный Творца ковчеже, молниелучный Христа сосуде, орошенная Духом Росоносным и от Ангела манною воспитанная, благодать свыше паче всех получившая, и всех тварей превосходящая! Дражайшая моя Покровительнице! Умилосердися надо мною, бедным иноком! Недомыслимаго Сло́ва престо́ле и Неизследимаго Жениха чертоже; благородное гнездо Орла Небеснаго и зерцало Христовых Таин; красото безплотным Ангелом и похвало угодником Божиим! Желанная моя Защитнице и Попечительнице! Не отри́ни просьбы в крайней нужде моей! Нетленная Родительнице Владычня, и браку непричастная, и неискусомужная Царице; несгораемая свеще́ ми́рови и слепотствующим светящая! Всепетая Мати-Уте́шительнице и Спасительнице! Спаси мене от лукаваго в пагубней сей суете!

Архангельский Гавриилов глас вопию Ти, Троицею увенчанная, Пронарече́нная Отрокови́це, между Богом и людьми посреднице обретшаяся: Царюющая, о радуйся! С Тобою Господь! Торжествуй, быти Матерь Владыки Мессии сподоблынаяся!

Общий Ангел хранитель наш еси, Дево, и в призывании скоропослушливая. Полезному моему прошению помощи можеши; поручница ми и житии исправительница буди!

Не хощу́ бо от Тебе более ничесоже, ниже́ дневнаго пропитания; единаго же то́чию желаю: даждь ми возлюбити всем сердцем Сына Твоего, Господа и Бога нашего Иисуса Христа, и Твоим Матерним ходатайством получити наследие жизни вечныя, честно́ю Кровию Его нам стяжанныя. Аминь.

Молитва девятнадцатая, преподобного Максима Грека

Тя, несравненною чистотою и безплотныя чины́ превосходящую, молю, Всепетая: скверную душу мою очисти от беззаконных помышлений, яже всегда рождаются во мне от злаго в плотских страстех навыкнове́ния, долгим временем обученннаго; и яже не престае́т се́яти в мысль мою лукавый демон, скверня́ и разслабляя ю присно скверными и льстивыми помыслами, спасению души моея зави́дяй. Сего ради молю Тя, Пречистая, не презри мене, бедне в сей скверней тине погружаемаго; но благоуханым миром молитв Твоих очисти мя от смрада сего; сладчайшим светом Божественныя любве измени всяческую тьму души моея; и уздою чистаго, всегда во мне пребывающаго, страха Божия укроти навеки мудрование безчинныя плоти моея, соблюдая ю в чистоте; да без порока возмогу умоляти Спасителя моего, единаго чиста суща естеством, и испрошу прощение беззаконий, имиже аз прогневах Его, живы́й? подобие скотом безсловесным и совершая всякое беззаконное студ о дея́ние; не имый страха пред Страшным Судя́щем Его; ни огня негасимаго бояся, ни тьмы кромешныя, ни червя непрестанно кишащаго, ни страшнаго скрежета зубнаго.

Темже тягчайшия муки ожидают мя, аще токмо не принесу покаяния, моим беззакониям равнаго. И аз, о Госпоже Царице, во ужасе трепещу и боюся, и крайними болезньми непрестанно уязвляюся в душе, и умом содрогаюся: како доселе деяния праведнаго Суда Божия минуша мене? Се бо моими руками Создателя моего пригвоздих, нага́го на Кресте распяв! О, неисчетныя благостыни Владычни! Оле моея жестокости грешнаго раба! Увы мне, увы мне! Како избегну чающих мене мучений?! Ка́я пропасть земная от лика Божия сокрыет мя?!

Но буди милостива ко мне, молю тя, Владычице! И умоли о мне Владыку, да милостив будет ко грехом моим, от великаго моего неразумия содеянным; и да подаст ми принести Ему покаяние, имже свобожуся от пасти страшнаго змия и злых приставников его. Ущедри мя, Владычице, к Тебе прибегающаго, и избави мя от сквернаго их насилия.

Неключимый раб Твой сый от юности, и на Тя надеяся, аз с радостию подклоних себе игу иноческому (аще мирянин, глаголи: «Христову»), от всего отрекся, да тако возмог бых избыти ждущих мя вечных мучений. Но и ныне сподоби мя безпреткновенно до конца донести сие иго добраго делания, Владыкою мне порученнаго; да хотя с делателями последняго часа улучу мзду от руки Его и услышу глас, внутрь чертога зовущий достойных причастия радости Владычня.

Ей, умоляю Тя, Пречистая Мати Вышняго, единое души моея утешение, упование и сладость, Божественный покро́ве, свете мой, заступление и спасение! Сподоби мя получити сие святыми молитвами Твоими. Ты бо еси, Владычице, начало спасения моего; возблаговоли же Сама и благий конец его устроити. Сотвори мя, Пречистая, причастника нетленныя славы от Тебе рождшагося возлюбленнаго Сына Твоего; да спасен Тобою, сподоблюся славити Единаго Триипостаснаго во единем существе Бога, Безначальнаго Отца, Собезначальнаго Сына и Всесильнаго Духа, Емуже подобает слава, честь и держава в безконечные веки. Аминь.

Молитва двадцатая, кающегося грешника

О Пресвятая Богородице, Пречистая Мати Дево!

К Тебе прибегаю, к Твоим Матерним объятиям припа́даю, заступления и помощи Твоея прошу. Се бо исполнихся скорби; беды обуревают мя; искушения и греси одержа́т бедную душу мою; весь недоумением исполнен есмь; слезами омочаю лице свое.

И где обра́щу спасение? К кому притеку недостойный?

Аще воззрю на Сына Твоего, страхом погружаюся: вем, яко Спаситель есть милостивый; обаче же и Судия праведный; аз же всегда попираю заветы Его, и яко мытарь не смею возвести на Пречистый лик грешных очес моих.

Аще ко святым обращуся, и паки тесно ми есть; ти́и бо бе́ша небесни житием, аз же весь землеи́ есмь; сего ради стыжуся молити их, яко далече от них отстояй деяньми моими.

Но аще и Ты святых святейша еси, и Херувим честнейша; обаче к Тебе прибегаю с надеждою. Не вем, откуду сицево́ дерзновение имам; верую, яко Мати всем сущи, Сама да́руеши таковую благодать чадом Твоим.

Сего ради умильно, яко истинную и благую Матерь свою, прошу и молю: не отрини мене непотребнаго и скорбнаго; услыши тайная воздыхания души моея опечаленныя; воззри милостивым оком на раба Твоего огорченнаго; простри Матерния руки Твои к бедней главе моей, ина́го прибежища не имеющей. И помози мне, яко Сама веси и волиши. Уте́ши сердце мое, печальми болезнующее; просвети ум мой, суетою омраченный; укрепи волю, грехми́ разслабленную; испроси благодать Святаго Духа Уте́шителя; и даждь вся, яже к жизни и спасению потребная; наипаче же введи мя во время свое в обители Сына Твоего и Бога моего.

Верую бо и вем несумненно, яко всяк, призываяй Тя от сердца, никакоже погибнет, но помилования от Господа сподобится; Твои бо есмы́ чада, и на ходатайство Твое непреложное упование имамы, яко Матерь еси Спаса нашего Христа Бога, Емуже слава со Отцем и Святым Духом во веки веков. Аминь.

Молитвенный вопль

Приклони ко мне ухо Твое, Чистая, и осени мя ликом Твоим, православно с благоговением и любовью к Тебе притекающему и со страхом покланяющемуся! Услыши сей глас мой молебный! По Бозе бо едину Тя предстательницу стяжах, Пренепорочная; яко Мати Бога, Творца и Зижди́теля еси, о Владычице, Иже от Тебе зрак наш прият, от тли и бед спасе́ нас и славою Божественною прослави нас человеколюбно. Оба́че не смею воз дети руце мои к Сыну Твоему: весь бо есмь осквернен, и Щедраго по естеству Бога на гнев обратих. Обаче к Тебе, Ходатаице, прибегнути дерзаю, да молю Тя, Пречистая: не отвержи у́бо мене от лика Твоего и милостива буди ми; и Сына Твоего благосерда соделай.

Аз же воспою Тя, Пресвятая! Бем, яко не красна похвала, от скверных усте́н Тебе приносимая; обаче намерение мое и веры теплоту приими милостивно, и виждь отчаяние души моея. Сего ради не отврати лица Твоего от хваления и вопля моего: аще и вем, яко на земли никтоже есть, иже Тя по достоянию воспети возможет, обаче моего дерзновения не презри, Благая. Вижду, яко зло делая, от Тебе, Владычице, присно отпадаю: но о чудесе! и тогда от Тебе Самыя а́бие помощь обретаю; яко Ты ве́си, о Мати Пречистая, егда́ от Тебе устраняюся, враг во глубину прегрешений душу мою нещадно ввергает и злобне надо мною смее́тся: Ты же моея погибели не хо́щеши, погибших Взыскание. Того ради возьму криле́ мои скоро, и полещу́ и прииду к Тебе, Надежде моей, спасающей от малодушия мене, окаяннаго. И мысленно пречистым Твоим стопам прикасался, в горести моей умоляю Тя: приими мя, яко Мати Милосердия, аще и попремногу грешен есмь; не пре́зри мя, человеческое сродство с Тобою имущаго, Чистая; избави мя от печали, имя Твое Божественное токмо призывающаго и язвы моя Тебе открывающаго.

Се ныне приношу Тебе моя вся тайная, яко Споручнице моей и Заступнице; надежду имея, да не обличит мя Сын Твой на праведнем Суде Своем! Тебе же, яко сын Матери, лютая грехи моя исповедаю; Твоему лицу представляю сту́дная дела моя, непостыдно на Тя надежду имея.

Откуда начну глаголати лукавая и беззаконная падения моя, страстный аз? Кий язык изрече́т содеянных мною зол безмерное море и прегрешений глубину? Удивися вся земля и ужасеся, зрящи мя творяща лютая злая и нелепая; и многое милосердие Сына Твоего на мне видящи, зело́ чудится. Несть бо ин в человецех, иже сицева́ неподобная соде́я, я́коже аз, не родися в мире, Благая, тако помрачен умом! И безответен сый, к Тебе, Богородице, прибегаю; и еще прежде исповедания моего Тебе, взываю: не омерзи, не омерзи мене, о Всенепорочная! Не отрини мене, паче всех грешнейша!

В деле и слове и в помышлениях несть зле пожи́вша, якоже аз. Безсловесными страстьми до́ле преклонихся и во глубину погибели ниспадох, и уже пламеню геенскому на сожжение сам себе сотворих. Неудержанное стремление ко злу влече́т мя обычаем моим лукавым и врага моего непрестанным действием. Душу мою всю оскверних и плоть свою сластьми́ растли́х, валяяся в сих на поругание человеком и смех бесо́м, себе же в погибель. Крепость мою разслабих, и весь ниц на земли лежу. Уже в страстех состарехся; обаче и еще язвы моя любосластьми чешу. Все время живота моего в блуде́х злых ижди́х. Законом плоти побеждаема неподобная беззакония совершаю всестрастный; огнь сластей опаляет мя и пленяет сердце мое. Всего себе оскверних страстьми срамными, и скверными мысльми помрачих ум мой. Блудницу превзыдох блудом и мытаря́ лихоимством. Бога Милосерднаго быти мне милостива молюся; сам же нравами немилосердными достойна вечному огню себе уготовляю. И се ныне душу мою преокаянную и́мам от страстей и грехов очерневшу и оцепеневшу: неразумие и забвение зол моих, яже в житии соде́ях, постиже мя. Ангельский чинове и воинства небесных Сил державе Сына Твоего ужасаются, Чистая; аз же, отчаявся, безстрашием одержим есмь. Храм тела моего и душу осквернив, еще и Церковь Господню презираю: человецы бо трепещуще в ню входят; аз же, блудный, без студа приступаю, увы мне!

Сих безмерных грехов моих ради, лютыми напастьми, болезньми и бедами томим есмь, окаянный; в скорби многи и печали впадо́х; нападения врагов видимых и невидимых окружают мя. Вем, яко наказуюся воистину не по равенству долга согрешений моих; но еще милуемь есмь от безприкладныя милости Всещедраго. Оба́че и сие милосердие и самыя ти́и напасти не удерживают мя, ко злу неудержимаго. И не вем: что буду прочее время живота моего?

В сластех валяяся, духовное богатство, от Отца Небеснаго ми данное, ижди́х блудно: благолепия и красоты доброту, ю́же в Крещении получих, аз погубих, Владычице, де́я неподобная; светлую одежду спасительныя благодати очерних преступленьми, неблагодарный; и скотом безсловесным уподобихся, славы Божия обнажився.

Того ради лютому и немилосердному мучителю вдан бых судом праведным: ловит мя, непрестанно искушая, змий лютый и человеконенавистный; бесо́м игралище бых, яко пленник безблагодатный; во адския врата низвергохся, ко двере́м мрачным приближихся. И весь неготов, тщуся идти тамо, влеком мытаря́ми нещадными, аще не Ты засту́пиши мя, Владычице. Вем бо, яко ужасаются и трепещут бесовстии полцы́ и самого Твоего и́мене, и бегут от единаго призывания Тебе, Царице всея твари. Не яви же мене им на радость: от диавольскаго насильства свободы и исхити мене. Конец приближается!

Уже близ при двере́х моего живота суд. И осуждение провидя дело́м моим лукавым, взываю Тебе усердно: в час, Дево, кончины моея предстани ми; и от рук бесовских, страшнаго испытания и мытарств горьких, от князя лютаго, осуждения, огня вечнаго избави мя, Богомати. И хотя в последний единонадесятый час жития моего даруй ми возстати от сна уныния и поработати в винограде¹² Сына Твоего; да по неизреченней Его благости и аз улучу дина́рий благодати, якоже и первый потрудившийся в по́двизех. Но боюся, Владычице, да не похитит мя внезапу конец жития моего: грехолюбив бо есмь и от врагов непрестанно боримь. Боюся, яко всепагубный змий скорою смертию возбранит ми к покаянию. И что тогда буду? Ужас лют одержит мя, егда помыслю и в чувство прииду от онаго Суди́ща Страшнаго и муки, конца не имущия! Страшуся испытания неподкупнаго и Судии незабытнаго! Рыдаю, плачу и стеню, егда кромешную тьму, огнь, червь, скрежет зубны́й воспомяну́. Изнемогает мой ум! В глубину греховную впад, в лености пребывая, благодати лишився, не имам надежды спасения отнюдь: и весь в унынии и отчаянии лежу, Пречистая, яко разслабленный при Овчей купели. Кий ответ принесу Судии́

И токмо к Тебе прибегаю, Ходатаице моя и Споручнице! Премени гнев Сына Твоего на милость. Вем, яко в жизни моей хранительницу и стену необориму стяжах Тя: и по кончине моей даруй ми обрести Тя покров и заступницу непобедимую, к Богу мя вводящу. Сие мое упование на Тя возложив, не убоюся врагов озлобления, не ужасаюся лаяния бесовскаго; яко Ты еси на врагов крепость и помощь твердая, и воевода неодоленная, к Сыну же Твоему Ходатаица непостыдная. Вем бо, яко Той, плоть заимствовав от Тебе, Должник Тебе есть, Пречистая; вем, яко и Сама еси дар от нас человек, данный Владычице на спасение мира. Приими же от мене́ дары красны, сия покаянныя вопли мои, воздающи Твоим всемощным заступлением; яко несть и́но что приятнейши Матери неже спасати чада своя и рабы Божия, аще и непотребни суть.

Возникни же от уныния и отчаяния, окаянная душе моя, и со дерзновением рцы Владыце: «Боже мой Милосерде и Человеколюбие! И ныне излей на мя Твою милость: молит бо Тя Надежда и Заступница моя, Мати Твоя. Не отрини мене, Христе; не извержи мене от чертога Твоего брачнаго: умоляет бо Тя Агница, рождшая Тя, Агнца Божия, взе́мшаго грехи всего мира. Благоутробным ликом Твоим и тихим оком воззри на Матерь Твою и на мене, непотребное чадо Ея, покровом Тоя́ заступаемое. Ты бо от Нея воплотился еси на спасение наше; и даровал еси Ю грешником стену прибежища и всему миру державную Ходатаицу. Приими убо молитвы Ея и о мне, унылом, и спаси мя, Спасе Милостиве. Да тако прославится Твое и Ея имя на земли и на небеси: Тою бо всякое дыхание к Тебе прибегает, и Ея ради щедроты Твоя на всех изливаются, Христе Благодателю. Молитвами Ея и аз, недостойный, уповаю на Тя, Спасителя мира».

Но, о Мати моя Милосердная! Се паки страх на́йде на мя, егда воспомянух обители райския: прегрешеньми осквернен и светозарный благодати Крещения обнажився, како в чертог украшенный вниду и ликом святых сочетаюся?! Тии бо добродетельми украсишася, аз же наг есмь и стыжуся; и трепещу, да не како буду изве́ржен от чертога Царскаго, аще и вниду тамо молитвами Твоими. Но се слышу глас в души моей: «Аще и в единонадесятый час жития твоего, поревнуй добрым делом, зла удалився! От лукаваго отре́кся, Божественным деянием поревнуй! Отри́ни леность и заповедем Божиим прилежи́! Целомудрен ум, чисто сердце и разум смотре́лив стяжи! Аще и немощен еси, и́маши Помощницу Всемощную, Заступницу Неодоленную, пути Твоя направляющую. Имаши, душе, молящуюся о тебе Богородительницу, непостыдную, милостивую, благолюбивую и человеколюбивую, на всякую помощь готовую и сильную Предстательницу. Притецы к Ней и рцы: «Помози ми, Богородице, помози! Да прочее время живота моего без порока прейду, Едина Чистая и Благословенная!»

Оле мне! увы мне! Сама зриши, Пречистая, яко от дел отнюдь спасения несть мне, малодушному: грехи бо прилагаю ко грехом и к злобе злобу; и уже отчаяхся в силе моей, в тину безсилия погрузився… Сама видиши, Пренепорочная, нищету окаянныя душй моей, безплотных же враг возстания на мя лютая. Недоумением одержим есмь; се ныне воздыхаю и плачу; но еще сущим слезам в очесе́х моих, уже паки о сластех помышляю. Не вем: что сотворю? И что отвещаю, аще не Ты Сама, Преблагословенная, спасеши мя, якоже во лиши. Сего ради верою теплою, аще и дел не и́мый, возопию к Тебе, Владычице: помилуй раба Твоего, помилуй! И то́чию о единем молю Тя: всем сердцем моим, Благая, исповедати грехи моя Искупителю моему сподоби мя! И сле́з каплю подаждь ми, яко блуднице. Оба́че и сие покаяние Сама ми даруй; ве́си бо, яко плени́цами согрешений моих стягнут сый отовсюду, к покаянным путем уклонитися не могу. Сего ради паки реку: Сама спаси мя, спаси! И еще прежде отшествия отсюду, покой надежды благия Матерними молитвами даруй ми. Храм сущи Творца всяческих, помолися, Преблагая, да Уте́шитель паки вселится в мя, вертеп душетленных разбойников бывша. Иныя помощи, разве Тебе, воистину не имам, Владычице: Сама мне помози!

Вем бо, вем, яко присно готова еси ко спасению нас; во дни и в нощи неусыпно мо́лишися о иже Тя призывающих и даруеши милости Твоя на Тя надеющимся. Вем, яко никтоже притекаяй к Тебе посра́млен от Тебе исходит, Пречистая Богородице Дево; но просит благодати и приемлет дарование к полезному прошению. Вем, яко несть грех, милость благодати Твоея побеждаяй: Матернее бо дерзновение имаши к Сыну Твоему и Богу. Вем сие, яко никтоже поги́бе, Чистая, иже надежду веры к Тебе стажа́ православно, Дево Мати Божия.

Сего ради под долгом вси есмы, Благодатная, вое́же благодарити, хвалити и славити милости Твоя благочестно, аще по достоянию и не можем блажи́ти Тя, Богородице. Аз же, грешный, молчанием понуждаюся чтити Тя, Всенепорочная: оба́че, милостей Твоих исполняемый, воззову к Тебе от души умиленныя: «Благословляя, благословлю Тя, Пречистая, и величаю те́пле! Кто бо не блажи́т Тебе, Пресвятая Дево? Творца миру, Спаса Христа и Единаго Владыку несказанно родила еси. Блаженни воистину чтущии Тя, Богородице: Тобою бо от всяких лютых избавляемся. Тя ед ину красну душе́ю, красну помышленьми, красну и телом обрет Господь, от чресл Твоих воплотися и наше безобразие украси. Сего ради превозносима есть во всем мире слава Твоя, Мати Дево, высшая небес и Херувим славнейшая. Ты Ангелом радость еси, праведником украшение, верным надежда, грешным спасение. Да возвеличится, Владычице, и моя душа смиренная и да восхвалит Тя благодарными гла́сы: Ты бо на всю жизнь дар от Бога дана еси нам во спасение. Отчаявся прежде веселия, ныне надежду в Тебе обретох. Вечер водворихся в плаче печалей и чаянии злых, радость Тя зау́тра паки имею. Ты крепость моя еси; Ты ми похвала и радование; хранительница моя, заступление и прибежище; покров и предстательнице моя, Богородице; Ты свет ми еси и просвещение; Ты избавление мое и ходатаица; Ты слава и надежда моя. Ты еси молитвенница моя, язв моих не гнушающаяся; Ты болезней моих нецелительнице; падающему мне возстание, согрешающу исправление, отчаянному укрепление. Проповедую усты́ и духом благодать Твою неизсякаемую; моление Твое облегчение мне бывает и всех бед разрешение».

Сих милостей не премолчу никогда, Богородице. Ты же мя, Твоего певца, благослови, Мати Пресвятая, да и паки воспою Ти песнь достойную. Кую же принесу Ти похвалу, Пречистая? Что же возыменую Тя? Кое ино радование возглаголю? Лучшаго не имам, разве еже «Радуйся», Гавриилом Тебе принесенное. С ним и аз возопию Тебе радостным гласом:

Радуйся, миру Радость воплотившая! Радуйся, Спасителя нам родившая! Радуйся, славо и похвало Ангелов! Радуйся, отрадо и надеждо человеков! Радуйся, праведных ве́нче и украшение! Радуйся, грешным якорю спасения! Радуйся, в скорбех сладкое утешение! Радуйся, во благоденствии охранение! Радуйся, отчаянных благая надеждо! Радуйся, всем уповающим заступление! Радуйся, Дево, Мати Божия! Радуйся, всех христиан Мати! Радуйся, Радосте радостей, радость покаяния подающая!

Сих воздыханий притекателя Твоего не отрини, Благая; и плач души моея в радость преложи. Исполни, Чистая, веселия сердце мое, Твою нетленную дающи радость, веселия Виновника рождшая. Печалей бурю разори, Начальника тишины Христа молящи. Радости мое сердце исполни, Дево, греховную печаль потребляющи. Смирившагося мя исцели, из нездравия во здравие претворяющи.

Честну́ю же Церковь, ю́же Сын Твой Честно́ю Кровию искупи, Сама ту́ю над ересьми и расколы победительницу Твоим заступлением сотвори; да в ней и Тобою спасаемый, присно в житии моем зову Избавителю и Богу моему. Яко разбойник, взываю Ти: помяни мя! Яко блудница, вопию: не отрини мене! Яко блудный сын, молю: приими мя! Молитвами Богородицы, Спасе, спаси мя!

И еще молю Тя, Пречистая: всегда приносити Тебе молитвы сподоби мя, и имя Твое призывати воспоминай ми; аще и не хотяща и унывающа, Сама к покаянию обращай мя; зане́ немощен сый и врагами от спасения отвращаем, и сего единаго ми пути не изволяю. Тобою же воздвизаемь, аще токмо яко младенец имя Матере моея звати не премолчу, верую, яко всяко Тобою спасуся и ныне, и во веки веков. Аминь.